Marami po sa amin ang ayaw nang madagdagan pa ang mga anak, dahil na rin sa hirap ng buhay. Nakaranas na rin po kami ng di sapat na pagkain, kawalan ng sapat na panahon para sa aming mga anak at pamilya. Isa sa nakikita po naming paraan o lunas ay ang pagplano ng pamilya at pagcontrol sa dami ng anak sa pamamagitan ng paggamit ng kontraseptibo subalit paano kami makakapagpatuloy sa paggamit nito kung walang sapat na suplay mula sa mga health center at tulong mula sa mga namumuno? Meron nga sa botika na mabibili subalit mas mahal pa sa isang kilo ng bigas. Kung gipit kami at papipiliin, mas higit na pipiliin ang pagbili ng bigas upang may maihain sa hapag kainan. Ang ganitong sitwasyon sa aming lugar ang nagiging dahilan kung bakit may mga babaeng nagpapalaglag kahit pa labag sa kanilang kalooban at nagiging sanhi ng komplikasyon, at kung minsan nauuwi sa kamatayan.

Pitong taon na ang SMKT ng tuloy-tuloy na pagserbisyo sa komunidad. Upang matugunan ang sari-saring problema, meron itong iba't ibang mga programa o proyekto. Merong pagtutulungan ng mga myembro sa oras ng emerhensiya na tinawag na Damayan. Ang mga myembro nito ay nag-aambag ng maliit na halaga upang maitulong sa sinumang myembro na magkakaroon ng emerhensiya sa kalusugan. Isang halimbawa ng nagawa na nito ang tulong sa isang myembro nang maaksidente sa motor at kinailangan dalhin sa ospital para tahiin ang sugat. Sa maliit na halaga na nakuha sa Damayan, agad siyang nabigyan ng anti-tetanus at paunang lunas. Pagkatapos magamit ang pondo, nag-aambagan muli para sa susunod na mangangailangan.